عاوزنها تبقى خضرا

والله ما عارف اقولك ايه
بس مش هقدر اقول غيرضاعت فلوسك يا ياسر
ما نابنا غير ان البلد كلها عرفت
ما علينا
عاوزنها تبقى خضرا الارض اللى فى صحرا
احنا رفعنا الشعار دة مش عشانا عشان مصر
والواد الغلبان اللى بيشتغل 16 ساعة فى اليوم عشان يعملوا قرشين راحوا كمان.
عليه العوض ومنه العوض.
بس ان شاء الله الفلوس جاية لا تقلق
بس هتاخر شوية
وانا قلت هعمل زى سنبل
سنبل بعد المليون
سنبل ضاع يا ولاد الحلال
هههههههههههه
خلينى اضحك يا عم محمود
مش مهم محمود مين
بس اى محمود
وخلاص
ربنا يسترها
انتظر قصيدة خاصة بالصحراء قريبا
معلش يا شباب مش هتفهموا انا بتكلم على ايه المرة ديه
بس حودة فاهم
وبقوله اكتب لنا اغنية زى اغانى الكيت كات كدة عشان الارض
وانتظر منى قصيدة جامدة طحن

المطبخ الامريكى

السلام عليكم
يا ترى فاكرين انا قلت ايه اخر مرة؟على العموم هفكركم
بالتخيل بتاع البيت الاسود الامريكى ..
تخيلت انى لبست طاقية الاخفاء زى ما قلت لكم .بس للاسف برضه دخلت من الباب الخلفى

زى ولى العهد ما دخل قبل كدة عشان الرخصة بتاع الطيران

طبعا فاهمنى واللى مش فاهمنى هيفهمنى بعدين.المهم دخلت .
عاوزكم تتخيلوا معايا يا ترى اول مكان هفكر ادخله ايه؟
واحد بيقول غرفه النوم وبيضحك والتانى بيقول الحمام والتالت بيقول طبعا غرفة الاجتماعات الخاصة ببوش
انا باءة سامحونى دخلت المطبخ
بتضحك ليه؟عادى يعنى مشوار من هنا لامريكا لازم اكون جعان طبعا
بس انا دخلت المطبخ عشان اتفرج على المطبخ الامريكى بتاع بلاده باءة .
عشان البنات فى مصر دلوات كلهم بيقولوا انا ان شاء الله لازم اجيب مطبخ امريكى لما اتجوزولازم العريس هو اللى يجيبه.
شوفت الموضوع سهل حتتين خشب وخلاص عشان كدة بقول لبناتنا بلاش المطبخ الامريكى دة وحش .

.شوفى حاجة عملية ..
بس شوفت ما هو اهم داخل المطبخ الامريكى.
منتجاتنا العربية كلها هناك .ما تستغربش اصل الاكل ما بيحلاش غير بمنتجاتنا العربية والعلم بتاع جامعة الدول كمان فوق المنتجات
وكل منتج بمسئوله الرسمى .كله بيجهز الاكل اللى بيقشر واللى بيسلق واللى بيسلخ واللى بيفرش واللى بيدوق الاكل
قبل فخامة الرئيس الامريكى احسن يكون فيه سم .وبرضه اللى بيشجب ويستنكر من طريقة عمل الاكل.
يعنى خلية نحل نشيطة جدا بصراحة ناس مجتهدين فى ارضاء الزبون.

الكلام دة من الساعة 10 صباحا حتى الثانية ظهرا داخل المطبخ الامريكى

هروح انام شوية وارجع اكمل .

انتظروووووووووووووووووووووووووووونى

يوم فى البيت الاسود الامريكى

والله مش عارف اقولكم ايه بس الواحد شاف ان موضوع التخيل دة شىء عظيم جدا

بيخلى الواحد اشبه بالمجانين وما احوجنا هذه الايام ان نحيا حياة المجانين

افضل ما نعيش بدماغنا وبعد شهرين تستهلك مش هنلاقيها تانى وبعدين الاسعار مولعة مش هنعرف نشترى غيرها

ما علينا.المرة ديه مش هتخيل حاجة لولى العهد انا هتخيل نفسى فى البيت الاسود الامريكى بس مش حاكم

انا هلبس طاقية الاخفاء يعنى هروح متخفى او البس ماسك احد حكامنا المقربين للبيت الابيض

خلينى لابس طاقية احسن. بدل ما يقولوا لى امسح واغسل والحاجات اللى بيعملوها الرجالة بتوعنا هناك

ما علينا انا هتخيل نفسى كدة هناك واشوف ايه اللى ممكن يحصل واقول لكم

انتظرونى فى البيت الاسود الامريكى ..

ولى العهد فى طابور العيش

دعونى اجمح بخيالى الى عنان السماء او دعونى اجمح بخيالى لدرب من الجنون

ماذا لو

ماذا لو السيد ولى العهد جمال مبارك يحتاج الى الوقوف فى طابور العيش من اجل ان يحصل على الخبز

بتضحكوا ليه ؟ هو انا بقول نكتة فيها ايه؟

تعالوا كدة نتخيل

ركن العجلة ونزل يقف فى الطابور فاكر نفسه ابن الريس باءة وتخطى الطابور عم شعبان واقف قاله ارجع يا اخينا اقف فى الدور

استنى لما يجى دورك خاف وسمع الكلام ورجع مكانه

ياه ايه الشمس ديه والا التراب والا العرق وريحة الناس اللى بقالهم ساعة واقفين فى الشمس

وبعدين هعمل ايه وارجع لماما ازاى من غير عيش

لالالالا انا راجل ولازم ارجع لماما بالعيش واستحمل

طلع عم مرزوق وقال ياجماعة الفرن فيه عطل 10 دقايق كدة ونشتغل تانى

طبعا الفرن ما فيهوش عطل ولا حاجة بس عم شحاتة اللى بيشترى الدقيق جه ومش عارفين يبيعوا له من الزحمة

طلع جوال الدقيق والتانى والتالت وجيمى واقف مش فاهم حاجة

قال يمكن الزبالة اللى طالعة من الفرن ديه هى اللى عاملة عطل

معذور ماشافش جوال دقيق بتاع الغلابة قبل كدة

العشر دقايق عدوا جيمى بدأ يزهق وبعدين يا بيه الفرن مش هتشتغل باءة

اصبر يا استاذ مش عاجبك روح لماما.

لا مش هروح انا لازم اروح بالعيش ماما هتتضربنى لو ما جبتش عيش

طيب ما تعيطش استنى هنشتغل اهو

اشتغل الفرن والضرب اشتغل

جيمى هيعمل ايه ؟ انا جمال يا ولاد ال......... انا جمال يا ولاد ال...........

طب والله لاخلى بابا يعملى فرن فى القصر مخصوص

وكمان هخليه يشغلنى رئيس جمهورية عشان اعلمكم الادب

وما حدش يقف اودامى فى الطابور

مصر الامن والامان

المرة ديه مش هكتب حاجة هسيبكم انتوا تكتبوا

سلام

فيها ومش فيها

كل الحكاية انى عايش فيها

ونفسى اموت فيها

خربوها وقال ايه مش فيها

لا والله فيها بس اللى فيها لحراميها

صاحبى قالى خلاص مالناش فيها

قلت لا .عمرى ما اسيبهم ينهشوا فيها

قالى انا ماشى قبل ما اتسجن فيها

راح اتغرب احسن ما اعيش غريب فيها

قلت لا .عمرى ما اسيبهم ينهشوا فيها

اصبر لما يموت واهو مش هيخلد فيها

لائيت الصغير كبر وابوه علمه ينهش فيها

بعت لصاحبى قلت له خلاص انا مش فيها

شوف لى حتة اعيش غريب فيها

احسن ما اعيش غريب هنا فيها

قالى خلاص اللى عندك خلونا عبيد هنا وفيها

خليك انا راجع ومش هنسيبهم ينهشوا فيها

مش هنسيبهم ينهشوا فيها

ديه هدية من اخوية وحبيبى كرم الله بس لازم تشوفوها انتم كمان

على فكرة
ممكن بكرة
تصحي تلاقي دماغك
تحت لفوق
بص يا ذوق
لو دا حصلك
اعرف انك
بكرة الدنيا معاك هتروق
بس نصيحة
اجري بسرعة وروح السوق
واشتري ديك
احمر ف أصفر
قد اديك
وهوريك
ان الدنيا دى مش مستاهلة
لحظة وواهلة
من تفكيرك
أصل الأصل
دا مش تدبيرك
عارف لو كنت انت مكاني
كنت هتعرف ان حياتك دي شىء تانى
طنش
طنش
طنش طنش تبقى مدندش
راح اخليك يا حبيبي منعنش
بس انا شرطى
انك تجري
تجري بسرعة وتشترى ديك
احمر ف اصفر قد اديك
مرة سألنى الواد شوكوكوكو
قالى اشمعنى انا هشتري ديك
طيب منخليها جموسة
تحلب لينا ولما نبيعها
تبقى فلوسها تكفي عروسة
يبقى اشمعنا انا هشترى ديك
قلت استنى هرد عليك
فز وقاله الواد سمعون
اه اشمعنا يا أبو الأستاذيذ؟
قاله يا عم دا واد مجنون
نشترى ديك
ناكله ف طقة ولما بتيجى الطقة التانية اهو راح الديك
يبقى تقولى هنشترى ديك
ديك
ديك ايه
قلت استنى يا سمعون بيه
واسمع منى
قالى سمعت الرعد ف ودنك قوم من جمبي
كنت انا فاكر انك فاهم اصل اللعبة
قلت اللعبة ؟!
قلت اللعبة دى مش فاديك
انا كان قصدي يوم منا قلت هنشترى ديك
انه يقوم بدري يصحيك
ف الفجرية ويدن ليك
تصحى تصلى
تدعى المولى
خيره وعدله
رزقه وفضله راح يكفيك
تنزل شغلك
تتقن عملك
ترجع بيتك
ليك لولادك
راح يرضيك
يبقى اسمعنى
واجرى بسرعة
واشترى ديك


كرم على
2008

رعاة البقر

رعاة البقر قد صاروا اسياد

وهانحن معشر العرب اصبحنا جياد

يعربدون باوطاننا ونحن على حياد

نلتف حول مائدة يزعمونها مائدة سلام

أى سلام وقد دنس الاقصى بقدم اللئام

؟ أى سلام واطفالنا تخشى المنام

أسالوا سماء سيناء اسلام بلادماء؟

سيناء قد تعطرت بدم الشهداء

اتساءل دوما اجولان عربية ام يهودية

أم ان الاقصى اصبح ليس له هوية

افيقوا قادة العرب قبل ان يسال الراعى عن الرعية

مبارك والحضرى

بعيدا عن اى انتماءات ودون اى مقدمات
دعونى اطرح سؤالا يجب ان نجد له جوابا فى اسرع وقت بناء على توجيهات السيد رئيس جمهورية مصر العربية .

الى أى مدى سوف تصل قضية الكابتن عصام الحضرى ؟

كنت اتوقع ان يتدخل الرئيس السويسرى لحل هذه المشكلة بدلا من الرئيس مبارك

لاننى كنت اعتقد ان مشاكل الشعب المصرى اكبر بكثير من مشاكل الشعب السويسرى

لان الرئيس السويسرى لديه مشكلة واحدة فقط هى ان شعبه بينتحر من كثرة الرفاهية

ولكن بعد تصريح الريس وجدت اننى فى غيبوبة حقيقية واكتشفت اننا شعب بلا مشاكل

لان الاوضاع الحالية ليست بمثابة مشاكل لدى النظام

ولكن هذا هو الواقع . نحن شعب بلا مشاكل
طالما ناكل ونشرب وننام ونمارس حياتنا الطبيعية وننجب اولاد وبنات وعايشين فى سبات وتبات .

الله عليكى يا مصر..........

والله شاهدت فيديو بالامس ما استطعت ان احتبس دموعى من الفرحة والحزن فى ان واحد

وجدت الحق يحاصر ومقيد باغلال حديدية

ورغم ذلك وجدت رجال صدقوا ما عهدوا الله عليه مقيدين ومبتسمين --- ماسورين ومجاهدين

مكبلين واصواتهم تزلزل القلوب الصلدة .

والله سمعت احدهم يقول ( مصر امانة يا شباب ) وانا اكتبها الان عينى تزرف دمعا وكلما رنت فى اذنى

عينى تزرف دمعا .
.يا سيادة الرئيس احرى بك ان تهتم بشعب قد تحمل الكثير من اخطاءكم ،

بشعب اصابته الفيروسات اللعينة بناء على توجيهات وزراء كم
الكرام بشعب قد اصابه السرطان بفضل توجيهاتكم العظيمة .
لا املك سوى ان اقول لك

ان كنت تحكم الان فانت غدا محكوم بين يدى الله عز وجل

محكوم فى اعظم واعدل محكمة لا تغادر صغيرة ولا كبيرة

اعمل لدنياك كانك تعيش ابدا واعمل لاخرتك كانك تموت غدا

والله اتمنى ان تقرا كلماتى وتعيها جيدا .

سامحونى يا جماعة لوكان دمى تقيل شوية بس كان لازم افضفض والا كان جرى لى حاجة

سلام عليكم

الملك شكمان

ارجوكم تسامحونى عشان انا بجرب اكتب زجل واستحملونى كمان.الواحد عمل مدونة باءة وعاوز يفضفض ولازم اجرب فى اصدقائى وحبايبى عشان يجاملونى ويقولوا الله رائع جميل حاول مرة تانى .
يمكن العنوان غريب شوية بس انا استوحيته من الف ليلة وليلة بتاع التليفزيون المصرى فى شهر رمضان الكريم.
هى زجلاية خفيفة كدة بس انتم لازم تقولوا لى رايكم عشان اشوف اكمل والا كفاية لحد كدة
كان ياما كان فى هذا العصر والزمان ملك اسمه شكمان
عنده وزير طويل ونضيف وولى العهد كفه خفيف
واثناء اجتماع لطيف قالوا ما تيجوا نخلى الحمل خفيف
ونبيع البيت لكوهين وجوزيف رد ابوكف خفيف وقال يا لطيف يا لطيف
رد نضيف جمد قلبك حبيبى معايا وعلى طول ويايايفتح الباب ويلم الارهاب

ادم فى ليبيا

بجد مش عارف ابدا كلامى بايه؟ بس انا اخترت العنوان دة عشان ادم ابن واحد حبيبى وصديقى واخوية .
كل حكايت ادم ان ابوه من حقه يامن له مستقبله وحياته قرر يسافر ليبيا مقابل ايه؟ مقابل انه يتخلى عن احلامه فى بلده ويبعد عن امه وابوه يعنى هى معادله صعبة شوية بس خلونى ابص لها بنظرة تانى لو صاحبى دة قلنا له اعمل اللى انت عاوزه هنا فى بلدك قول رايك بحرية انتخب اللى انت عاوزه ماحدش هيعتقلك ماحدش هيخوفك ماحدش هيحاسبك على انفاسك اللى بتاخدها هتشرب ميه نظيفة وتشم هواء نضيف وتاكل اكل مش مسرطن .
على فكرة نست اقولكم ان صاحبى دة كان ناجح جدا هنا وفى مجال متميز جدا.
انا فى اللحظة ديه مش بتكلم على صاحبى بعينه بتلكم على كل شاب اتخلينا عنه بسهوله , افتكرت ابو الشاب اللى مات فى محاولة هجرة غير شرعية لايطاليا لما قال لو فيه فرصه تانى لاخوه ويحاول يهاجر تانى انا موافق. يااااااااااااااااااااااااه للدرجة ديه الموت اصبح ارحم من العبشة فى مصر والا احنا ميتين اصلا فى مصر ؟ والا دة ارحم شوية من الشاب الجميل اللى عاوز يهاجر اسرائيل وبكل فخر يظهر فى وساثل الاعلام المرئية ويقول انا فى اسرائيل هيحترمونى ويقدرونى اكتر من هنا والله انا التمست له العذر بس لازم نسال نفسنا ليه؟ ليه؟ ليه؟ وفى الحالة ديه مش هينفع اقول من غير ليه زى عبد الوهاب لان الاسباب واضحة ومعروفة كويس ارجوكم حد يقولى ليه هسيبكم تجاوبونى .وما حدش يقولى من غير ليه ؟ سلام

صباح الخير يا مصر

صحيت من النوم غسلت وشى بماءنا العذب النظيف الى ما فيهوش اى شوائب ونزلت لشغلى وانا معدى لائيت زحمة كبييييييييرة سالت ايه دة؟ قالوا لى دة مركز المعلومات بيستخرجوا منه شهادات ميلاد بخمسة جنيه قلت يااااه كل الناس ديه ما عندهاش شهادات ميلاد؟
قالوا لى لالالالالا ديه عشان هى مطلوبة عشان بطاقات التموين الجديدة اللى بيوزعوا فيه سكر وشاى وزيت وعدس وارز
حسبتها مع نفسى كدة بالة حاسبة لاقيت لو كل مواطن دفع 5 جنيه يكفونا تموين لمدة 10 سنين جاية اكتشفت ان دة عمل عظيم من الحكومة يجب ان نشكرهم عليه جمعية من الشعب عشان يقبضها الشعب سكر وزيت وعدس يا بلاش .....